Pinda akabidhiwa ripoti ya CAG ya ubadhirifu Kariakoo

Waziri Mkuu, Mizengo Pinda, amekabidhiwa ripoti ya Mdhibiti na Mkaguzi Mkuu wa Hesabu za Serikali (CAG) aliyoiagiza kuhusu tuhuma za ukusanyaji ovyo na ubadhirifu wa mapato ya Soko Kuu la Kariakoo jijini Dar es Salaam.

Mkaguzi huyo, Ludovick Utoh, alikabidhi ripoti hiyo kwa Pinda jijini Dar es Salaam.

Ripoti hiyo inafuatia nyingine ya aina hiyo iliyotolewa na Utoh kuhusu Kituo cha Mabasi cha Ubungo aliyokabidhiwa Waziri Mkuu mjini Dodoma mwezi uliopita.

Akipokea ripoti kuhusu Soko la Kariakoo, Pinda alimpongeza CAG kwa kazi aliyoifanya na kuahidi kuwa kilichomo ndani yake kitafanyiwa kazi haraka.

Katika ripoti zote mbili, CAG aliainisha matatizo na kutoa mapendekezo ya kurekebisha hali ilivyo ili kuiboresha.

Waziri Mkuu alibaini, pamoja na mambo mengine, kuwa Kituo cha Mabasi cha Ubungo na Soko Kuu la Kariakoo ni maeneo mawili ambayo yangeingiza mapato makubwa kwa jiji, lakini ukusanyaji wake ni wa ovyo na kuna tuhuma za ubadhirifu.