TANGAZA BIASHARA YAKO HAPA KWA BEI NAFUU / ADVERTISE YOUR BUSINESS HERE AT CHEAP RATES | CONTACT ME: kilinyepesi@gmail.com

 photo DTB_zps7bd2662d.jpg

 photo fl_zps09337f7a.jpg


Habari Mpya:
Tuesday, August 18, 2009

Mchungaji anayeishi na VVU awashutumu wachungaji wenziye

12:43 PM
Na Simon Mhina

Mchungaji Amin Sandewa wa Kanisa la Kiinjili la Kiluther Tanzania (KKKT) ambaye anaishi na virusi vinavyosababisha ugonjwa wa Ukimwi (VVU), amewashutumu viongozi wa dini kwa tabia yao ya kuwahimiza vijana kupima kabla ya kufunga ndoa, huku wenyewe wakikwepa kupima.

Mchungaji Amin aliyasema hayo wakati anaongoza ibada ya Jumapili, katika kanisa hilo Usharika wa Tabata jijini Dar es Salaam.

Baada ya mahubiri yake yaliyowasisimua waumini, wengi walijitokeza kupima hapo hapo Kanisani lakini viongozi wa usharika huo ‘waliingia mitini’ huku wazee wa kanisa wakijifanya bize kuhesabu sadaka.

Akihubiri katika ibada hiyo Mchungaji Amin alisisitiza umuhimu wa viongozi wa dini kujitolea kupima, ili wawe mfano kwa waumini wao.

Alisema yeye aligundulika kwamba anaishi na virusi tangu mwaka 1999, lakini hadi leo anadunda na anaendelea kumtumikia Mungu.

Alisema kutokana na unyanyapaa, wengi huogopa kupima, kwa kudhani wakifanya hivyo watadharaulika, wataonekana wazinzi au watu wasio na maana.

“Mimi pamoja na kwamba ni Mchungaji niliamua kupima, na bado nafurahia uamuzi wangu maana unanifanya niishi bila wasiwasi, hata siku moja tusikubali kuwa watumwa wa mambo yaliyopita, tuwe watumwa wa mambo yajayo,” alisisitiza katika mahubiri yake.

Mchungaji huyo alisema baadhi ya watu wanaogundulika wana virusi, hawafi kwa ajili ya ugonjwa, bali kinachowatoa roho ni woga na wasiwasi.

“Unajua jinsi au namna unavyopokea taarifa ni muhumu kuliko taarifa yenyewe? Kuna watu watatu walihukumiwa kufa kwa kupewa sumu kali. Sumu zikaandaliwa kwenye glasi mbili, ya tatu ikawekwa maji.Wa kwanza na wapili walikunywa wakafa papo hapo, lakini cha ajabu yule ambaye glasi yake ilikuwa na maji, naye alipokunywa alidondoka akafa. Hii maana yake ni kwamba kilichomuua sio sumu bali woga,” alisema Mchungaji Amin.

Alisema kuna mahali fulani aliendesha semina, kisha akawaambia watumishi wa Mungu wapime, la sivyo hawapati ‘mshiko’.

Alisema jambo hilo lilimletea balaa, kwani viongozi hao walinukuu Katiba, wakidai hairuhusu kulazimishwa.

“Jamani, kwenye kupima malaria watu hawapekui Katiba kwenye Ukimwi inakuwa hivyo, hii inafanya suala la virusi liendelee kuwa tatizo. Watu wangekuwa tayari kuukabili ugonjwa huu ungemalizika kwa muda mfupi sana, kwa vile tunao uwezo wa kuudhibiti. Tukumbuke kwamba hapo kale palikuwa na magonjwa yaliyoua watu wengi kuliko Ukimwi, lakini yaliweza kudhibitiwa na jamii," alisema.

Alisema Ukimwi ni changamoto kubwa katika ulimwengu wa sasa lakini kwa watu wanaomtegemea Mungu wanapata nuru hata kama wameambukizwa.

“Wale wasio wanyofu wa moyo, wanaendelea na giza lao, lakini wanaomtazama Yesu wanapata nuru ya kuwafanya waendelee mbele,” alisema.

Aliwataka viongozi wote wa kidini, kuonyesha mfano wa kupima na kueleza hali zao, ili wawe mfano bora katika kutokomeza ugonjwa huo.

Mchungaji huyo alisema anamshukuru Mungu kwa ujasiri, kwani licha ya kwamba mkewe na mtoto wake wameshakufa, lakini hana hofu yoyote. Katika zoezi la upimaji kanisani hapo, waumini wengi walijitokeza kupanga misururu, lakini hakuna kiongozi aliyethubutu kupima.



0 comments:

Post a Comment

 
BONYA HAPA